Die ghemene wilkuer van Goylant (derde schaarbrief 13-1-1455)
Wy burgemeesters, scepenen ende rade der stede van Nairden ende wy gemene waren uuten vier dorpen van Goylant doen kondt allen goeden luden mit desen openen brieve, hoe wy tesamen eendrachtelick mit malcanderen overeenghedragen ende verwillkuert hebben voir ons ende alle onse nacomelingen in allen manieren ende punten als hierna bescreven staet, dat is te weten :
Item dat affter desen dach van huyden datum hieronder gescreven ghien manspersone, wye hy sy, uuten Ghestichte poirter noch buerman werden en mach noch en sell in der stede van Nairden noch in den vier dorpen in Goylant by een peen van twehondert ryers ende so wye hierenboven dade, stede offte dorpen voirs. off yemant van den gherechte in der stede offte in den dorpen voirs. die de annamen boven dat voirs. is, die souden dese twehondert ryers voirs. selver ghelden ende betalen uut hoir tselffs goet, sonder yemant des te verdragen ende hieroff sel hebben onse ghenadige heer van Burgondie een derdendeell ende onse stede een derdendeell ende die vier dorpen in Goylant een derdendeell ende dat tesamen gelyck te deelen.
Item voirt yenich manpersone van onsen poirteren offte yenighe buermannen uut Goylant, die dair hylicte an een Stichs wyff ende wairt sake dat dat wyff hoir man ende hoir kynderen sturven, so en soude dat wyff dan ghien gemeente genyeten noch veltslach doen, tenwair dat sy weder hylickte an onsen poirteren offte an een buerman in Goylant van den dorpen voirs. by derselver peen voirs.
Item voirt so en sall poirter noch buerman in Goylant voir nymant uutten Ghestichte van Utrecht, die in die stede van Nairden offte in Goylant woenen woude, verantwoirden noch op hoeren dach gaen noch burghe voir hem werden, roerende van dese voirs. saken by een peen van XXV ryers.
Item alle dieghene, die nutertyt uut den Gestichte sitten in Goylant, die en sellen mayen, speten noch delven off ghien saken hem onderwynden datter ghemeenten angaet, by een peen van thien ryers.
Item voirt waert sake datter yenich Stichs man quaem mitterwoen in Hollant uten Gestichte, die en soude nochtan poirter noch buerman werden moegen, mer hy soude staen in allen manieren als voirs. is van den Stichtsen mannen ende anders niet, by denselven penen voirs.
Item van die peen van twehondert ryders ende die peen van vyffendetwyntich ryers ende van die peen van thien ryers, dair sell off hebben onsen genadigen heer een derdendeell, die stede een derdendeell ende die vier dorpen in Goylant een derdendeell ende dat ghelyck te delen.
Item affter sinte Petersdach sall die weyde bewreet wesen ten eersten werkendach toe na meyedach ende wairt sake datter yenige beesten hierenbynnen op quaem, die mach men scutten ende dryven, elcken in synen ban, dair men willen, tot des scoters huys ende woude die scoter hem syn ghelt niet geven van die scotinge so mach diegene, die die beesten gescut heefft, die scotinge selver houden.
Item voirt so en sellen die guste beesten gaen opten harden van Apcouwer market tot meyedach toe buten der bevreder weyden by dree stuvers.
Item nyemant heet offte plaggen te mayen offte scaren te rapen oestwert van Blarecommer moelen ende in den ban van Laerrekarspell ende van Blarechommerkarspell ende van Huyserkarspell by een boet van dree pont ende dairoff mach becueren elks int sanders ban ende dairt recht off te nemen elx dair hy will, dairoff mach becueren een van den gerechte off twe poirters off twe buermannen offte een poirter mit een buerman.
Item van alle dese voirs. kueren van scatten van veltslach ende dat die gemeente angaet, dair sall off hebben die heer een derdendeell ende die se becuert twe deell
Item van alle dese voirs. punten sel men een ygelick een onvertogen recht off doen, dair men dat recht begeert, off yemant die men dair vant rechtsweghen off uutsenden.
Item van alle dese voirs. kueren mach bekueren een van den gherecht off twe poirters off twe buermannen offte een poirter mit een buerman.
Item dese ordinancie ende overdrachte sall staen ter tyt toe, dat die stede van Nairden mit die vier dorpen uut Goylant eendrachtelick anders overdragen, alle argelist uutgesondert.
Omdat dit wair is ende tesamen houden willen ende van enen ygelyc gehouden willen hebben, soe hebben wy burgemeesters der stede voirs. onse zegell an desen brieff gehangen. Ende omdat ick Ghysgen Coppenzoen, burgemeester van Hilfersum selver ghien segell en hebbe van onsen buerwegen, so heb ick gebeden Claes Coppenzoen, myn broeder, dit over my te bezegelen. Ende om bede wille Ghysgen Coppenzoen voirs. so hebbe ick Claes Coppenzoen myn seghell mede an desen brieff gehangen. Ende omdat ick Jan Zwaeveldenzoen, buergermeester van Laren selve ghien segell en hebbe, so heb ick gebeden van ons buer wegen Heynrich Winninck dit over rny te bezegelen. Ende om bede wille Jan Zwaveldenzoen voirs. so heb ick Heynrick Wynninck myn segell mede an desen brieff gehangen. Ende omdat ick Peter Elbertzoen, burgermeester van Huysen selver ghien segell en hebbe, so heb ick gebeden Ghysgen Weldigenzoen dit over my ende van ons buer wegen te besegelen. Ende om bede wille Peter Elbertszoen soe heb ick Ghysgen Weldigenzoen voirs. myn zegel mede an desen brieff gehangen. Ende omdat ick Heynrick Harmssoen, burgermeester van Blarcom selve ghien zegell en heb, so heb ick gebeden Peter Rogerszoen van ons buerwegen te bezeghelen. Ende om beden wille Heinrick Harmszoen so hebbe ick Peter Rogerzoen voirs. myn zegell mede an desen brieff gehangen. Int jair ons heren dusent vierhondert vyffendevyfftich gegeven op sinte Poncianusavont.
Bron: Sa Naarden, Archief stad en lande van Gooiland, privilegeboekje.
Uitgegeven door J.H. Sebus, De erfgooiers en hun gemeenschappelijk bezit (tot 1568)( Amsterdam 1934) en D.Th. Enklaar, Middeleeuwsche rechtsbronnen van stad en lande van Gooiland (Utrecht 1932)